DERTGIRA ADMINISTRATIVA DIL CANTUN GRISCHUN R 14 22 5. combra consistenta da parsura Stecher, president Meisser e derschader administrativ Audétat, actuara ad hoc Berry-Cathomas SENTENZIA dils 27 da schaner 2015 en la caussa en lita da dretg administrativ A._____, representaus digl advocat lic. iur. Josef Brunner, recurrent encunter Vischnaunca X._____, adversaria da recuors concernent assicuranza da biestga
- 2 - 1. L’associaziun da segironza da biestga Y._____ (numnada el text suandont: ASB Y._____) era in’associaziun da dretg public ed haveva tenor ils statuts dils 15 da schaner 1997 igl intent d’indemnisar ses commembers per donns che resultavan, sche animals carpavan ni stuevan vegnir mazzai pervia da malsognas ni d’accidents. Sin igl 1. da schaner 2001 ei la basa legala per associaziuns da dretg public per l’assicuranza da biestga vegnida abolida. La radunonza extraordinaria dalla ASB Y._____ haveva perquei gia decidiu ils 23 da november 2000 denter auter da fusiunar cun l’associaziun d’assicuranza da biestga Z._____ (numnada el text suandont: AAB Z._____) sin igl 1. da schaner 2001 ed haveva approbau il contract concernent. La ASB Y._____ ei vegnida sligiada sin la fin digl onn 2000. Avon sia dissoluziun eran quater possessurs da biestga commembers dad ella. In da quels era il recurrent. Ils treis auters ein entrai sin igl 1. da schaner 2001 ella AAB Z._____. La ASB Y._____ ha pagau la facultad en proporziun dils commembers ch’ein entrai ella AAB Z._____ tenor las envernonzas che mintga commember haveva a caschun dalla dumbraziun dil muvel il matg 2000. Il recurrent ei buc entraus ella AAB Z._____ ed ha assicurau siu muvel tier la B._____ SA. La cumpart dalla facultad dil recurrent da fr. 14’616.80 en la ASB Y._____ ei vegnida surdada alla vischnaunca da Y._____ (naven digl 1. da schaner 2013 Vischnaunca X._____) cun la cundiziun da duvrar quels daners el senn dad art. 45 al. 3 dils statuts dalla ASB Y._____. 2. Ils 29 da fenadur 2013 ha la suprastonza communala dalla Vischnaunca X._____ tractau la damonda dil recurrent da pagar la summa da fr. 14’616.80 ad el respectivamein alla B._____ en favur da siu fegl e successur legal C._____. La vischnaunca ha supplicau il recurrent cun brev dils 17 d’october 2013 dad inoltrar in mussament per attestar l’entrada per igl 1. da schaner 2001 en in’associaziun d’assicuranza da biestga equivalenta ed il commembradi da quella. Ils 22 d’october 2013
- 3 ha la vischnaunca retschiert dalla B._____ la confirmaziun dils 21 d’october 2013, ch’il recurrent hagi assicurau siu muvel naven digl 1. da schaner 2001 tier la B._____ encunter fiug, eveniments elementars ed accidents. 3. Cun il conclus dils 21 da schaner 2014 ha la suprastonza communala decidiu da renviar la damonda dil recurrent. El hagi assicurau la biestga tier la B._____ encunter fiug, eveniments elementars ed accidents. In’assicuranza da biestga encunter malsogna porschi la B._____ denton buc. Quella seigi consequentamein buc ina societad d’assicuranza da biestga cun statuts corrispundents e cun commembers che portien la societad conform ad art. 879ss. DO. Ella hagi buc igl intent d’indemnisar tenor ils statuts ses commembers per donns che resultien, sch’ins perdi animals pervia da malsognas ni d’accidents. L’assicuranza da biestga seigi plitost succedida sin basa d’ina relaziun contractuala denter il recurrent e la B._____. Cun quei seigi el buc entraus en in’autra societad d’assicuranza da biestga e la B._____ hagi buc il dretg alla facultad. Art. 913 al. 2 DO stipuleschi plinavon che la facultad dall’associaziun dissolvida, la quala resti suenter che tuts deivets seigien pagai e suenter che eventuals certificats da participaziun seigien restitui, astgi vegnir repartida denter ils associai mo, sch’ils statuts prevedien ina tala repartiziun. Pertuccont la ASB Y._____ seigi quei buc il cass ed in pagament da cumparts dalla facultad a commembers seigi exclus. 4. Encunter quella decisiun ha il recurrent inoltrau ils 20 da fevrer 2014 in recuors alla Dertgira administrativa dil cantun Grischun. El pretenda che la disposiziun vegni annullada cumpleinamein e che la vischnaunca stoppi vegnir obligada da pagar sia cumpart alla facultad da liquidaziun da fr. 14’616.80, resultada a caschun dalla dissoluziun dalla ASB Y._____, alla B._____ en favur dall’assicuranza da biestga da C._____, Y._____.
- 4 - El argumentescha essenzialmein che la facultad existenta a caschun dalla dissoluziun dalla societad stoppi, tenor art. 45 al. 2 dils statuts dalla ASB Y._____ dissolvida, vegnir repartida proporziunalmein sin las assicuranzas, en las qualas ils singuls commembers entrien suenter la liquidaziun. Ei sappi buc esser decisiv en quei connex, schebein la nova assicuranza porschi sper l’assicuranza da biestga aunc autras spartas d’assicuranza ni buc ed en tgei fuorma societara ch’ella seigi organisada. La ASB Y._____ seigi era buc in’associaziun el senn dad art. 879 ss. DO; ella eri in’entitad giuridica dad art. 19 dalla lescha cantunala d’agricultura abolida el fratemp, aschia ch’il tierm „associaziun“, duvraus el statuts, munti semplamein „societad“ e buca specificamein „associaziun“. Quei seresulti era dil fatg che art. 36 dils statuts determineschi che assicuranzas supplementaras sappien era vegnir fatgas tier ina „associaziun da segironzas privata“ e che assicuranzas privatas seigien strusch organisàdas sco associaziuns (era sche la B._____ hagi schizun tratgs d’ina associaziun e seigi cheutras in’excepziun da quella regla). Cun assicurar sia biestga tier la B._____ hagi il recurrent damai adempliu las premissas numnadas en art. 45 dils statuts dalla ASB Y._____ per che sia cumpart alla facultad da liquidaziun vegni pagada a sia nova societad d’assicuranzas. 5. En sia consultaziun dils 11 d’avrel 2014 pretenda la vischnaunca da refusar il recuors. Ella explichescha surtut ch’igl uffeci d’agricultura dil Grischun hagi survigilau la conversiun dalla ASB Y._____ ella AAB Z._____ ed hagi examinau che la facultad vegni duvrada conform alla lescha ed als conclus dalla radunonza da commembers. Ella stat tier la motivaziun ch’il recurrent seigi buc entraus sco commember ella AAB Z._____ ni en in’autra associaziun d’assicuranza da biestga renconuschida, cunquei che la B._____ seigi buc ina societad d’assicuranza da biestga cun igl intent concernent e che l’assicuranza
- 5 purschida prevedi buc indemnisaziuns, sch’ins perdi animals pervia da malsognas. Cun quei hagi la ASB Y._____ stuiu surdar la cumpart dalla facultad dil recurrent alla vischnaunca per administrar la summa el senn dad art. 45 al. 3 dils statuts dalla ASB Y._____. 6. Ella replica dils 2 da zercladur 2014 explichescha il recurrent principalmein che era la AAB Z._____ assicureschi buc automaticamein il cass da malsogna normal, mobein assicureschi quel sulettamein el rom d’ina varianta facultativa. Negin dils treis purs che seigi entraus ella AAB Z._____ suenter la dissoluziun dalla ASB Y._____, hagi fatg quell’assicuranza supplementara, perquei che las premias seigien bia memia aultas. Il recurrent seigi sedecidius per la B._____ ed hagi aschia era assicurau a moda ordinaria sia biestga naven digl 1. da schaner 2001. Las assicuranzas sedifferenzieschien unicamein concernent la persuna dalla societad purtadra, ferton che las relaziuns d’assicuranza seigien identicas. Cun quei havessi sia cumpart stuiu vegnir assignada alla B._____. 7. La vischnaunca fa valer en sia duplica dils 16 da zercladur 2014 supplementarmein ch’il recurrent seigi buc entraus sco commember ella B._____. Decisiva seigi tenor las stipulaziuns en art. 45 dils statuts dalla ASB Y._____ numnadamein la commembranza en in’associaziun d’assicuranza da biestga e buca la conclusiun dil contract cun ina instituziun d’assicuranza. La dertgira trai en consideraziun: 1. El cass present fuorma la decisiun dalla vischnaunca dils 21 da schaner 2014 igl object da contestaziun. Igl object da recuors consista dalla
- 6 damonda, schebein la decisiun dalla vischnaunca da refusar la damonda dil recurrent da transferir alla B._____ sia cumpart dalla facultad egl import da fr. 14’616.80 sa vegnir protegida ni buc. 2. a) La ASB Y._____ era vegnida fundada a basa dil vegl art. 19 dalla lescha cantunala per mantener e promover l’agricultura (lescha d’agricultura; DG 910.000) dils 25 da settember 1994, abolius per igl 1. da schaner 2001, ed a basa dad art. 47 ss. dall’ordinaziun davart la tratga, la vendita e la segironza da biestga; CUL 1994, 3170) dils 26 da matg 1994, abolida per igl 1. da schaner 2001. Tenor art. 47 dall’ordinaziun haveva l’assicuranza da biestga igl intent da porscher in’indemnisaziun als possessurs d’animals da nez agricols en cass da donns che resultavan, sche animals carpavan ni stuevan vegnir mazzai pervia da malsognas ni d’accidents. Applicond art. 48 dall’ordinaziun stuevan ils possessurs da biestga schizun assicurar obligatoriamein lur animals encunter donns per evitar situaziuns d’urgenza entras la perdita d’animals pervia da malsognas ni d’accidents. L’ordinaziun reglava en art. 50 ss. las associaziuns d’assicuranza da biestga promovidas e survigiladas dil cantun, las qualas prestavan a norma dils statuts indemnisaziuns als possessurs da biestga en cass che quella carpava ni stueva vegnir mazzada pervia da malsognas ni d’accidents (cf. art. 56). Tier quellas associaziuns d’assicuranza da biestga setractava ei d’associaziuns da dretg public (cf. missiva dalla regenza al cussegl grond concernent la lescha d’agricultura e las ordinaziuns respectivas dils 23 da november 1993, carnet nr. 6/1993-94 339, p. 369; cf. era PDA 1970 nr. 68). Tenor art. 51 dall'ordinaziun stuevan ils statuts dallas associaziuns d'assicuranza da biestga cuntener denter auter disposiziuns davart lur dissoluziun. Ils statuts dalla ASB Y._____ dils 15 da schaner 1997, approbai digl Uffeci d'agricultura dil Grischun ils 23 da fenadur 1997, prevedevan ina tala regulaziun en art. 45. Mo quella norma ei consequentamein relevanta per la damonda co la
- 7 dissoluziun dalla ASB Y._____ haveva da succeder surtut arisguard la facultad (cf. era art. 829 DO). b) Per il cass dalla dissoluziun dalla ASB Y._____ normava art. 45 al. 2 dils statuts il suandont: "Sche l'associaziun vegn sligiada, vegn la facultad repartgida proporziunalmein denter las associaziuns da segironza da biestga, ellas qualas ils commembers entran suenter la dissoluziun". Mo per cass che negins commembers dalla ASB fussen entrai directamein suenter la dissoluziun en in'autra associaziun d'assicuranza da biestga, havess la facultad tenor art. 45 al. 3 dils statuts astgau vegnir duvrada tenor art. 913 DO per auters intents dall'associaziun ni per intents da nez public. Cunquei che treis dils quater commembers ein entrai directamein ella AAB Z._____ sin l'entschatta da schaner 2001, ei art. 45 al. 2 dils statuts applicabels. Tenor il text corrispundent vegn la facultad repartida proporziunalmein denter las "associaziuns da segironza da biestga", en las qualas ils commembers entran suenter la dissoluziun. Gia els statuts vegn duvrau il tierm "associaziuns da segironza da biestga" e buca per exempel il tierm "societad d'assicuranza" en general. Gia sin fundament dil text eis ei visibel ch'ina entrada en in'autra assicuranza da biestga, constituida sco associaziun (el cass present da dretg privat), era prevedida per effectuar in transferiment dalla cumpart alla facultad. c) En accordanza cun las explicaziuns precedentas haveva la radunonza extraordinaria dalla ASB Y._____ decidiu ils 23 da november 2000 co la facultad seigi da reparter suenter la dissoluziun dalla ASB Y._____. Il recurrent era presents alla radunonza numnada ed haveva enconuschientscha dil cuntegn dalla discussiun. Tenor il protocol dalla radunonza havevan ils commembers che entravan directamein ella AAB Z._____ da surdar a quella l'entira summa che vegneva repartida sin els. Sch'in commember entrava en in'autra associaziun d'assicuranza da biestga
- 8 renconuschida, haveva el medemamein da surdar a quella l'entira summa che vegneva repartida sin el. Era duront la radunonza ei cun quei vegniu duvrau il tierm d'ina "associaziun da segironza da biestga" ed aschia vegniu confirmau che la fuorma legala ("associaziun") ed igl intent dall'assicuranza (sulettamein "segironza da biestga") ein relevants. Quella interpretaziun vegn ultra da quei sustenida dil contract denter ils commembers dalla ASB Y._____ e la AAB Z._____ dils 6 d'october 2000, approbaus dalla radunonza extraordinaria dalla ASB Y._____ ils 23 da november 2000. En cefra 5.1 da quei contract vegn explicau: "Da es sich um eine Auflösung handelt, muss gemäss den Statuten sämtliches Vermögen anteilsmässig an die Versicherungsgenossenschaft gehen, in welche die Mitglieder nach der Auflösung übertreten. Eine Auszahlung an einzelne Mitglieder, welche ihren Viehbestand nicht bei einer Viehversicherungsgenossenschaft versichern möchten, ist nicht möglich“. Cun quei eis ei stabiliu ch'ina cumpart proporziunala dalla facultad astgava vegnir transferida mo, sch'in commember dalla ASB Y._____ entrava, en cass che quella vegneva dissolvida, en in'autra associaziun che haveva analog alla ASB Y._____ unicamein igl intent d'assicurar la biestga. Ch'ina tala regulaziun ei usitada, demuossan per exempel ils statuts dallas associaziuns d'assicuranza da biestga organisadas sin plaun regiunal che existan dapi igl 1. da schaner 2001 (p.ex. Associaziun d'assicuranza da biestga da U., da V. e da W.). Il text concernent la regulaziun en cass da dissoluziun dall'associaziun respectiva concordescha cun quel en art. 45 al. 2 dils statuts dalla ASB Y._____. Ultra da quei menziunescha il text tudestg dils statuts explicitamein l'entrada en in'autra associaziun d'assicuranza da biestga e buc en ina societad d'assicuranza generala che assicurescha denter auter era animals. Che las assicuranzas da biestga existentas tenor dretg vegl duevan vegnir organisadas vinavon sco associaziuns, resorta dalla brev digl
- 9 - Uffeci d'agricultura dil Grischun dil december 2000. En quella renda igl uffeci attent che las associaziuns d'assicuranza da biestga da dretg public da tochen ussa stoppien, sin fundament dall'aboliziun dalla basa legala corrispundenta, u vegnir transferidas naven digl 1. da schaner 2001 en associaziuns regiunalas da dretg privat u vegnir menadas vinavon sco associaziuns da dretg privat independentas ni vegnir dissolvidas. d) Ina particularitad dallas associaziuns d'assicuranza da biestga specialisadas d'assicurar biestga ei la dimensiun dalla garanzia entras l'assicuranza. Tenor art. 1 dils statuts dalla ASB Y._____ haveva quella igl intent d'indemnisar ses commembers per donns che resultavan dalla perdita d'animals pervia da malsognas ni d'accidents. Tenor art. 29 dils statuts indemnisava l'associaziun ils donns, sch'animals assicurai carpavan ni stuevan vegnir mazzai pervia da malsognas ni accidents. Il donn entras la perdita d'animals pervia da malsognas era ina part caracteristica dalla garanzia entras l'assicuranza dalla ASB Y._____. La AAB Z._____, constituida sco associaziun da dretg privat tenor art. 828 ss. DO, ha tenor art. 3 dils statuts dils 6 d'october 2000 medemamein igl intent d'assicurar ses commembers encunter il donn che resulta, sche animals assicurai van alla malura ni ston vegnir mazzai pervia da malsognas, accidents ni eveniments elementars. Ella porscha in'assicuranza per biestga e sa era porscher in'assicuranza per biestga manedla ed in'assicuranza supplementara per biestga. Tenor las cundiziuns d'assicuranza per biestga porscha la AAB Z._____ duas variantas d'assicuranza (cf. cefra 2.1): La varianta "Z._____-Basis" assicurescha donns da fiug e donns elementars, accidents e malsognas, sche gest plirs animals ein pertuccai il medem mument dalla medema malsogna. La varianta "Z._____-Plus" cuviera supplementarmein la malsogna d'animals singuls (quei tenor las cundiziuns en cefra 2.3). Era la AAB Z._____ preveda perquei gia ell'assicuranza da basa ina garanzia entras l'assicuranza per il donn che resulta dalla perdita d'animals pervia da malsognas, sco quei ch'ella vegn
- 10 dil reminent era purschida d'autras associaziuns d'assicuranza da biestga (p.ex. U., V. e W.). e) L'assicuranza elegida dil recurrent ei francada en in'associaziun, cunquei che la B._____ Svizra Associaziun stat sur la B._____ Svizra Holding SA, dalla quala fa part denter auter la B._____ SA. Independentamein dalla structura giuridica ei la B._____ denton activa en differentas spartas d'assicuranza (surtut assicuranza da mobiliar e d'edifecis, assicuranza da vehichels, assicuranza da viadis, assicuranza d'accidents e da malsauns, assicuranza da veta) e buc unicamein en quella dall'assicuranza da biestga, sco las associaziuns d'assicuranza da biestga. Ultra da quei ha il recurrent saviu assicurar ses animals tier la B._____ encunter fiug, eveniments elementars ed accidents, denton buc encunter malsognas. Da quellas explicaziuns resulta che la B._____ dispona buca dallas caracteristicas d'ina associaziun d'assicuranza da biestga. Cun assicurar sia biestga suenter la dissoluziun dalla ASB Y._____ tier la B._____, ha il recurrent buc adempliu las premissas numnadas en art. 45 al. 2 dils statuts dalla ASB Y._____ per transferir alla B._____ sco nova assicuranza sia cumpart alla facultad dalla ASB Y._____. Perquei ch'il recurrent fa buca pli valer ella procedura presenta ch'in pagament dalla facultad hagi (eventualiter) da succeder ad el persunalmein, scrodan explicaziuns respectivas. Il recuors vegn renviaus. La vischnaunca ha damai agiu legalmein cun renunziar da pagar alla nova assicuranza la cumpart dil recurrent alla facultad dalla ASB Y._____ dissolvida. 3. Sin fundament dil resultat present dalla procedura van ils cuosts a quen dil recurrent sco part perdenta (art. 73 al. 1 dalla lescha davart la giurisdicziun administrativa [LGA; DG 370.100]). Alla vischnaunca vegn concedida negina indemnisaziun dallas parts, perquei ch'ella ha gudignau en siu camp d'activitad ufficial (art. 78 al. 2 LGA).
- 11 - La dertgira decida damai: 1. Il recuors vegn refusaus. 2. Ils cuosts da dertgira, consistents - d’ina taxa dil stadi da fr. 1'500.-- - e dallas expensas da canzlia da fr. 230.-total fr. 1'730.-van a quen dad A._____ ed ein da pagar enteifer 30 dis suenter la consigna da questa sentenzia all’administraziun da finanzas dil chantun Grischun, Cuera. 3. [Indicaziun dals meds legals] 4. [Communicaziuns]