Grigioni Tribunale amministrativo 4a Camera 27.06.2017 A 2016 28

VERWALTUNGSGERICHT DES KANTONS GRAUBÜNDEN DRETGIRA ADMINISTRATIVA DAL CHANTUN GRISCHUN TRIBUNALE AMMINISTRATIVO DEL CANTONE DEI GRIGIONI A 16 28 e 29 ses 4. combra Parsura Stecher ed actuara ad hoc Berry-Cathomas SENTENZIA dils 27 da zercladur 2017 ella caussa en lita da dretg administrativ A._____, recurrent encunter Vischnaunca O.1._____, adversaria da recuors concernent la taxa da hosps e la taxa turistica

- 2 - 1. Ils 14 d’uost 2015 ha la vischnaunca O.1._____ tarmess a A._____ il quen „Taxaziun e quen taxas turisticas“ da fr. 125.00 (taxa fundamentala) pertuccont il menaschi puril per igl onn calendar 2015, ed ils 27 da november 2015 il quen „Taxaziun e quen taxas da hosps e turisticas“ pertuccont la tegia da cuolm B._____ ella proprietad dil recurrent. Sin basa d’ina surfatscha da habitar netta da 78 m2, in factur da 0.7 ed in prezi da fr. 7.00 ha la vischnaunca calculau per igl onn calendar 2015 ina taxa da hosps da fr. 382.20 sco pauschala annuala per la tegia duvrada sco habitaziun da vacanzas (zona C). 2. Ils 30 da november 2015 ha il recurrent fatg protesta encunter las disposiziuns cun la damonda da revocar quellas. La taxaziun cumpleina dil menaschi puril (taxa turistica) cun dus loghens da producziun en duas vischnauncas seigi buca gesta. Tier la tegia da cuolm a B._____ setracti ei plinavon buca d’ina habitaziun da vacanzas. Quella seigi ina part integrala dil menaschi puril e vegni mo duvrada per intents agricols. 3. Cun la decisiun dils 2 da zercladur 2016 ha la partiziun finanzas/persunal dall’administraziun communala dalla vischnaunca O.1._____ refusau las protestas cumpleinamein ed attestau las disposiziuns ed ils dus quens. Il recurrent renconuschi che siu menaschi agricol hagi in liug da producziun sil territori dalla vischnaunca O.1._____ ed hagi cun quei da pagar annualmein la mesadad dalla taxa fundamentala tenor art. 17 al. 1 dalla lescha turistica (LT). Art. 10 al. 2 LT prevesi che la taxa da hosps per habitaziuns da vacanzas e tegias da cuolm vegni incassada en fuorma d’ina pauschala annuala calculada sin fundament dalla surfatscha da habitar netta. La summa da fr. 382.20 cumpegli tuttas persunas che fetschien diever dalla habitaziun. Il recurrent sco proprietari motiveschi negin domicil da dretg fiscal ella vischnaunca e sappi far diever dalla purschida turistica independentamein dalla durada dall’utilisaziun.

- 3 - 4. Encunter quella decisiun ha il recurrent inoltrau ils 27 da zercladur 2016 in recuors tier la dertgira administrativa dil cantun Grischun. In menaschi pign accessori stoppi buca pagar duas pauschalas da menaschi, perquei ch’el hagi dus loghens da producziun. El hagi ina part dil menaschi a O.2._____ (vischnaunca dad O.3._____; ca. 3,5 ha) e tschella a O.4._____ (vischnaunca O.1._____; ca. 5 ha). Sch'ins quenti la taxa cumpleina en dus loghens ed en duas differentas vischnauncas, setracti ei d’in tractament inegual enviers quels purs che hagien mo in liug da producziun en ina vischnaunca. Tegias da mises che vegnien buca nezegiadas turisticamein encunter pagament, seigien tenor art. 15 LT deliberadas d’ina taxaziun. La tegia da mises a B._____ seigi ina part integrala dil menaschi puril e vegni duvrada mo dils commembers dalla famiglia sezza e mo per intents agricols, cura ch’els seigien a O.4._____ a far fein ni per autras lavurs. La tegia seigi mai vegnida affittada a jasters, els hagien mai dau albiert a hosps e la tegia seigi negina casa da vacanzas. La decisiun dalla vischnaunca seigi da renviar. Cun la brev dils 30 da zercladur 2016 ha il recurrent tarmess aunc ina gada il recuors cun suttascripziun. 5. En sia consultaziun dils 2 d’uost 2016 pretenda la vischnaunca da refusar il recuors, aschi lunsch ch’ei seigi dad entrar en quel. Il menaschi agricol dil recurrent hagi a O.4._____ (vischnaunca O.1._____) in da dus loghens da producziun. Il menaschi principal sesanfli a O.2._____ (vischnaunca dad O.3._____) e cun quei meini il recurrent a O.4._____ ina filiala el senn dad art. 13 al. 1 cif. 3 LT. La taxa turistica dalla vischnaunca O.1._____ secumponi d’ina taxa fundamentala e d’ina cumponenta variabla. Menaschis agricols paghien per onn sulettamein la mesadad dalla taxa fundamentala tenor art. 17 al. 1 LT, nun ch’il menaschi furneschi supplementarmein alla producziun primara era prestaziuns agroturisticas sco durmir el strom, stizun dil bein puril, gastronomia e

- 4 semegliontas. Quei seigi denton cheu buca il cass ed il recurrent hagi mo da pagar la mesadad dalla taxa fundamentala (fr. 125.00). Ina taxa en quell’altezia seigi cumpatibla cun la pratica dalla dertgira administrativa dil cantun Grischun e dalla dertgira federala. La pauschala vegni buca repartida denter las vischnauncas, cunquei che mintga vischnaunca stoppi relaschar in’atgna lescha turistica, la quala seigi applicabla mo sin siu territori da vischnaunca. L’obligaziun da pagar la taxa fundamentala turistica seigi buca in tractament inegual visavi menaschis che hagien mo in liug da producziun en ina vischnaunca. Art. 17 al. 1 LT pertucchi mo il cass ch’il menaschi obligau da pagar ina taxa turistica seigi activs en la vischnaunca O.1._____ en pliras branschas, las qualas seigien obligadas da pagar la taxa a moda differenta (p.ex. in’interpresa da schubergiar che affittescha professiunalmein habitaziuns da vacanzas a tiarzs). Sch’il recurrent seigi obligaus da pagar en dus loghens la (mesa) taxa fundamentala, vegni el tractaus egualmein ad auters menaschis che seigien activs en pliras vischnauncas (p.ex. bancas, negozis da victualias, pendicularas). Art. 15 LT seigi tenor text e sistematica mo applicabels per la taxa turistica. El cass present setracti ei denton d’ina taxa da hosps per la tegia da B._____. Il recurrent sconuschi en quei connex la differenziaziun legala denter la taxa turistica e la taxa da hosps. Era l’argumentaziun dil reccurent ch’ei setracti tier la tegia da B._____ buca dad ina habitaziun da vacanzas, cunquei ch’ella vegni duvrada mo per intents agricols e seigi part integrala dil menaschi puril, sappi buca perschuader. Tenor LT seigi la taxa da hosps da pagar sco pauschala annuala a basa dalla surfatscha netta da habitar. Ina taxa da hosps hagi mintga hosp da pagar che stetti sur notg ella vischnaunca e che hagi la pusseivladad da far diever dalla purschida turistica senza motivar domicil da dretg fiscal. La taxa vegni messa a quen al proprietari digl object, independentamein dalla durada dall’utilisaziun. La surfatscha da habitar netta corrispundi alla surfatscha utilisada per habitaziun tenor la

- 5 communicaziun da schazetg digl uffeci da stimaziun dil Grischun. In mises seigi tenor art. 4 lit. c LT numnaus explicitamein sco object da taglia per la taxa da hosps. Il recurrent motiveschi negin domicil da dretg fiscal ella vischnaunca O.1._____ e sappi far diever dalla purschida turistica. La tegia da B._____ vali cun quei sco menaschi da loschament cun obligaziun da pagar taxa tenor art. 4 lit. c e d LT. Finalmein satisfetschi la pauschalisaziun alla pratica dalla dertgira administrativa dil cantun Grischun e dil tribunal federal. 6. En sia replica dils 18 d’uost 2016 remarca il recurrent ch’ei mondi tier quei recuors per ina decisiun fundamentala, numnadamein sch’in menaschi puril accessori che possedi dus loghens da producziun en duas vischnauncas e che profiteschi buca da prestaziuns agroturisticas, stoppi pagar ina taxa per liug ni mo ina suletta. Ord il quen dils 27 da november 2015 seigi ei buca veseivel, schebein ei setracti d’in quen per la taxa da hosps ni per ina taxa turistica. Era ina taxa da hosps per igl object dalla tegia a B._____ seigi buca giustificada. En art. 6 al. 1 lit. b LT vegnien „persunas che lavuran en lur professiun tenor in urari da lavur usitau“ liberadas dalla taxa da hosps. Ei seigi evident che sia lavur sco pur d’in menaschi accessori, che cultiveschi a O.4._____ pliras hectaras funs, sappi strusch vegnir taxada sco vacanzas. El entscheivi cun sias lavurs a O.4._____ il matg cun far seivs per las cauras. Autras lavurs da primavera seigien il manteniment da baghetgs, trer grascha, rimnar e far mantuns cun caglias el territori, nua che las cauras pasculeschien, controllas regularas dalla muntanera, etc. La stad vegni la tegia da cuolm duvrada (tenor aura e vegetaziun) naven da miez zercladur entochen miez settember cun far fein e risdiv. Quella lavur seigi buca calculabla, aschia ch’ins gnanc savessi schar a tscheins la tegia duront la stad, damai ch’ins sappi buca cura che l’aura lubeschi da fenar e cura buca. Igl atun seigi ei da demontar las seivs, trer grascha els territoris teiss ch’ins

- 6 sappi buca ladar la primavera, far ballas-fein per transportar quellas a O.2._____, etc. Sch’il menaschi puril vegli far diever sez da quei object, sappien ins buca trer a nez quel per affittar a hosps da vacanzas. Ei seigi buca pusseivel da nezegiar la tegia da B._____ sco object turistic ed aunc da duvrar quella sco part integrala dil menaschi. Sco emprem stoppi igl agen diever star, e pér en quei mument ch’ina tegia vegni insumma buca duvrada sco ina part integrala d’in menaschi, sappien ins pretender ina taxa da hosps. Ultra da quei seigi la tegia buca baghegiada ora aschia ch’ins savessi nezegiar ella turisticamein. Plinavon corrispundi la surfatscha da 78 m2 tenor quen buc allas relaziuns effectivas. La taxaziun nova dils 15 da fenadur 2016 cumprovi che la cefra che la vischnaunca drovi sco basa da taxaziun seigi memia aulta. 7. Ella duplica dils 6 da settember 2016 fa la vischnaunca valer ch’il liug principal da producziun dil menaschi dil recurrent seigi a O.2._____ ella vischnaunca dad O.3._____. Cun quei seigi il liug da producziun ella vischnaunca O.1._____ ina filiala e l’obligaziun da pagar la taxa turistica seigi dada. Il recurrent hagi domicil a O.2._____ e seigi proprietari d’ina tegia ella vischnaunca O.1._____. Cunquei ch’el hagi buca domicil da dretg fiscal ella vischnaunca O.1._____, seigien las premissas per stuer pagar ina taxa da hosps ademplidas. La pauschala annuala per agen diever pretendi buca che l’infrastructura turistica vegni effectivamein nezegiada. 8. En sia proposta dils 16 da settember 2016 argumentescha il recurrent che la sedia principala da siu menaschi puril seigi buca ella vischnaunca dad O.3._____, mobein ella vischnaunca O.1._____. El habiteschi a O.2._____ e possedi ina tegia a B._____. Quella seigi denton ina part integrala da quei menaschi ed indispensabla per insumma saver far il pur a O.4._____.

- 7 - 9. Cun la brev dils 21 da settember 2016 ha la vischnaunca renunziau da prender aunc ina gada posiziun. 10. Cun la brev dils 2 da matg 2017 ei la vischnaunca vegnida supplicada da prender posiziun concernent la damonda dalla surfatscha da habitar netta applicada per calcular la taxa da hosps tenor il quen dils 27 da november 2015. La posiziun corrispundenta datescha dils 15 da matg 2017. Il derschader singul trai en consideraziun: 1. Tenor art. 29 al. 2 dalla lescha davart las taglias communalas e davart las taglias da baselgia (LTCTB; DG 720.200) giudichescha la dertgira administrativa dil cantun Grischun recuors encunter decisiuns da protesta communalas en fatgs da taglia. La decisiun dils 2 da zercladur 2016, cun la quala la vischnaunca ha refusau las protestas dil recurrent ed attestau ils quens pertuccont la taxa turistica da fr. 125.00 e la taxa da hosps da fr. 382.20, fuorma in object da contestaziun adattau. Sco adressat material e formal dalla decisiun contestada ei il recurrent pertuccaus ed ha in interess dign da vegnir protegius per abolir quella (art. 50 dalla lescha davart la giurisdicziun administrativa [LGA, DG 370.100]). Sin il recuors inoltrau enteifer termin e conform allas prescripziuns formalas vegn cun quei entrau. Igl object da recuors consista dalla damonda, schebein la decisiun dalla vischnaunca da refusar la damonda dil recurrent da revocar ils quens dils 14 d’uost 2015 (taxa turistica) e dils 27 da november 2015 (taxa da hosps) sa vegnir protegida ni buc. 2. Tenor art. 43 al. 1 LGA decida la dertgira administrativa per regla en ina cumposiziun da treis derschadras e derschaders. Secund art. 43 al. 3

- 8 - LGA decida ella en cumpetenza da derschadra singula u da derschader singul, sche la valeta en lita surpassa buca fr. 5’000.00 e sch’igl ei buca prescret in gremi da tschun (lit. a) ni sch’in mied legal ei evidentamein inadmissibels u evidentamein motivaus u buca motivaus (lit. b). La vischnaunca ha tschentau al recurrent dus quens ell’altezia da fr. 125.00 e da fr. 382.20. La valeta en lita ei cun quei sut fr. 5’000.00. Plinavon eis ei per quella caussa buca prescret in gremi da tschun e la cumpetenza dil derschader singul ei damai dada. 3. La vischnaunca ha tschentau al recurrent ils 14 d’uost 2015 in quen pertuccont ina taxa turistica per siu menaschi puril el vischinadi da O.4._____ (taxa fundamentala da fr. 125.00 per igl onn calendar 2015). Il recurrent fa valer plirs motivs daco ch’el seigi buca obligaus da pagar quella taxa. a) La taxa turistica ha la basa legala ella lescha davart las taxas da hosps e taxas turisticas (lescha turistica, LT) per la vischnaunca O.1._____ dils 28 da settember 2014, entrada en vigur igl 1. da schaner 2015. Tenor art. 1 LT incassescha la vischnaunca ina taxa turistica per promover il turissem. Las entradas dalla taxa turistica ein da duvrar per expensas ch’ein principalmein egl interess dall’economia turistica. Ellas dueien cunzun pussibilitar d’elaborar a moda effectiva la fiera turistica sco era da promover cun in bien effect da reclama eveniments sportivs e culturals (art. 2 al. 2 LT). Suttamessa alla taxa turistica ei mintga activitad d’interpresa resp. mintga activitad d’interpresa en ina professiun libra en vischnaunca (art. 14 al. 1 LT). Ils subjects dalla taxa turistica ein numnai en art. 13 LT. Da pagar ina taxa turistica han denter auter menaschis da producziun, commerci e mistregn (lit. c), persunas natiralas e giuridicas che han ella vischnaunca loghens da producziun, filialas ni posts da

- 9 fatschenta cun sedia principala ordeifer la vischnaunca (lit. d) e menaschis purils (lit. e). b) Il recurrent renconuscha ch’el meina in menaschi puril en dus loghens, numnadamein el vischinadi da O.4._____ (vischnaunca O.1._____) ed a O.2._____ (vischnaunca dad O.3._____). Pertuccont la damonda, sch’ei setracta tier la part dil menaschi a O.4._____ d’in liug da producziun ni dalla sedia principala, ha el fatg explicaziuns cuntradictorias ellas scartiras processualas. En siu recuors ha el constatau che siu menaschi puril hagi la sedia principala ella vischnaunca dad O.3._____. En sia davosa posiziun ha el denton fatg valer (sereferend allas dimensiuns dil funs cultivau da ca. 3.5 ha a O.2._____ e ca. 5 ha a O.4._____) che la sedia principala sesanfli ella vischnaunca O.1._____. Sco stabiliment dall’interpresa vala tenor art. 7 al. 2 dalla lescha da taglia per il cantun Grischun (DG 720.000) ina installaziun fixa, ella quala vegn praticada cumpleinamein ni parzialmein l’activitad commerciala d’ina interpresa ni d’ina professiun libra. Sco liug da producziun en quei senn valan tenor art. 4 al. 2 dalla lescha federala davart la taglia federala directa (LFTD, CS 642.11) denter auter filialas, installaziuns da fabricaziun ni luvratoris. Sco il recurrent expona, cultivescha el a O.4._____ pliras hectaras funs, lai pascular cauras, fa fein e risdiv e transportescha las ballas da fein a O.2._____. Cunquei ch’el tegn sil territori dalla vischnaunca O.1._____ temporarmein animals da nez e raccolta fein, setracta ei tier la part dil menaschi a O.4._____ silmeins d’in liug da producziun agricol. Independentamein dil fatg, sche la sedia principala da siu menaschi puril sesanfla a O.4._____ ni sch’el meina leu mo in liug da producziun cun sedia principala a O.2._____ (e cun quei ordeifer la vischnaunca), pratichescha el sil territori dalla vischnaunca O.1._____ in’activitad d’interpresa ed ei cun quei a basa dad art. 13 lit. d ni e LT en mintga cass subject dalla taxa turistica.

- 10 c) Il recurrent critichescha ch’el hagi da pagar la taxa fundamentala dalla taxa turistica ella vischnaunca O.1._____ ed era ella vischnaunca dad O.3._____. Aschi lunsch ch’el fa valer che la taxa fundamentala seigi a basa dad art. 17 al. 1 LT era mo da pagar ina gada da menaschis che seigien suttamess alla suveranitad da taglia da pliras vischnauncas, eis ei buca da suandar sias explicaziuns. Art. 17 al. 1 LT ei mo applicabels en cass ch’in menaschi ei activs ella vischnaunca O.1._____ en pliras branschas, las qualas ein obligadas da pagar la taxa a moda differenta, e buca en cass che la persuna obligada da pagar taglia ei suttamessa alla suveranitad da taglia da pliras vischnauncas (SDA A 16 2 dils 16 da fevrer 2016 consid. 4b). Il recurrent ei incontestadamein buca activs en pliras branschas ella vischnaunca O.1._____. La vischnaunca ha lu era cun raschun mess a quen mo ina taxa fundamentala. L’incassaziun dalla taxa fundamentala entras omisduas vischnauncas ei plinavon buca in tractament inegual, sco quei ch’il recurrent fa valer. Tenor il principi dalla regularitad dall’imposiziun da taglia ston persunas che sesanflan en relaziuns egualas vegnir cargadas a moda eguala cun taglias, ed inegualitads essenzialas ellas relaziuns effectivas ston menar a cargas fiscalas consequentamein differentas (art. 127 al. 2 CF, cf. era art. 8 al. 1 CF; SDA A 16 22 dils 6 da settember 2016 consid. 5a). Cuntrari a menaschis ch’ein activs mo en ina vischnaunca e ston pagar consequentamein mo ina taxa fundamentala dalla taxa turistica, ei il recurrent el cass present activs en duas vischnauncas ed ei aschia suttamess alla legislaziun fiscala vertenta en mintga vischnaunca. El vegn perquei tractaus tuttina sco autras persunas natiralas ni giuridicas che han la sedia principala da lur menaschi en ina vischnaunca ed ina filiala en in’autra vischnaunca.

- 11 d) Cun incassar la taxa fundamentala cunterfa la vischnaunca O.1._____ ultra da quei buc al scamond intercantunal davart l’imposiziun dubla da taglia. La suveranitad legislativa d’ina vischnaunca ei limitada sin igl agen territori communal. La lescha da turissem dalla vischnaunca O.1._____ sa perquei buca vegnir applicada per fatgs da taglia ella vischnaunca vischina. Ei corrispunda plinavon era alla realitad vivida ed alla pratica che persunas obligadas da pagar taglia cun in’activitad d’interpresa resp. in’activitad da professiun libra en pliras vischnauncas cun taxas turisticas, ein era suttamessas en differentas vischnauncas alla taxa turistica. Questa carga fiscala multipla dil medem pagataglia cun taxas turisticas da pliras vischnauncas ei insumma buca da criticar, ton pli ch’il pagataglia ch’ei activs cun siu menaschi en pliras vischnauncas, profitescha era en pliras vischnauncas dallas expensas dalla communitad che stattan en connex cun il turissem. Quella carga fiscala multipla dil medem pagataglia cun taxas turisticas da pliras vischnauncas ei negina imposiziun dubla da taglia intercommunala. Ina tala ei mo il cass, sche duas ni pliras vischnauncas dil medem cantun pretendan tier la medema persuna la suveranitad da taglia per il medem object (SDA A 16 2 dils 16 da fevrer 2016 consid. 4b e 4c cun ulteriuras indicaziuns). Ina tala identitad digl object da taglia ei buc avon maun el cass present. L’activitad d’interpresa dil recurrent ella vischnaunca O.1._____ fuorma anzi igl object ed aschia igl object fiscal dalla taxa turistica dalla vischnaunca O.1._____, ferton che l’activitad agricola fuorma igl object ed aschia igl object fiscal dalla taxa turistica dalla vischnaunca dad O.3._____. e) La taxa turistica secumpona d’ina taxa fundamentala e d’ina part variabla supplementara. Tuts obligai han da pagar ina taxa fundamentala annuala da fr. 200.00 tochen fr. 450.00 (art. 17 al. 1 LT). Menaschis purils han da pagar annualmein mo la mesadad dalla taxa fundamentala, nun ch’il menaschi presti – per quei dat ei el cass present denton negins indezis –

- 12 supplementarmein alla producziun primara era prestaziuns agroturisticas sco durmir el strom, stizun dil bein puril, gastronomia e semegliont (art. 17 al. 3 LT). La taxa fundamentala importa fr. 250.00 tenor art. 9 al. 1 lit. a dallas disposiziuns executivas tier la lescha turistica per la vischnaunca O.1._____ dils 24 da november 2014 (DELT; sebasond sin art. 18 al. 1 LT). Per menaschis purils cun producziun primara che obtegnan pagaments directs, munta la taxa fundamentala a fr. 125.00. La taxa turistica vegn fixada ed incassada mintgamai per igl onn calendar (perioda da taglia; art. 10 al. 1 DELT). El cass present ha il recurrent buca fatg valer che l’altezia dalla taxa fundamentala seigi memia aulta. Per quei dat ei era negins indezis (cf. SDA A 01 102 dils 22 da schaner 2002). Sin basa dallas normas menziunadas eis ei buca da criticar che la vischnaunca ha mess a quen al recurrent ina taxa fundamentala annuala da fr. 125.00 per igl onn calendar 2015. 4. Era la taxa da hosps ha sia basa legala ella lescha communala davart las taxas da hosps e las taxas turisticas. Tenor art. 1 LT incassescha la vischnaunca sper la taxa turistica ina taxa da hosps per promover il turissem. Las entradas dalla taxa da hosps ein da duvrar per finanziar implonts ed occurrenzas turisticas ch’ein destinai pil hosp e che san vegnir utilisai predominontamein da lez (art. 2 al. 1 LT). Subject dalla taxa da hosps ei mintga hosp che stat sur notg en vischnaunca senza motivar leu in domicil da dretg fiscal e che ha la pusseivladad da duvrar la purschida turistica (art. 5 al. 1 LT; art. 4 lit. a LT). En connex cun la taxaziun dalla taxa da hosps differenziescha la LT denter la taxaziun tenor pernottaziun (art. 9 LT) e la taxaziun cun ina pauschala annuala obligatoria (art. 10 LT). Da pagar ina tala pauschala han proprietaris, gudiders ni fittaders permanents da habitaziuns da vacanzas, e quei independentamein dil cuoz e dallas frequenzas dalla dimora. La pauschala annuala sebasa sil diember en media da pernottaziuns ad onn

- 13 en ina habitaziun (art. 10 al. 1 LT). Sco hosp che stat sur notg en ina habitaziun da vacanzas el senn dad art. 10 al. 1 LT vala el senn d’ina enumeraziun finala mintgin che affittescha buca ed ei proprietari giuridic ni economic, gudider ni fittader stabel e sias visetas (art. 10 al. 2 LT). Che era la pauschalisaziun d’ina taxa da hosps ei legitima, han ton la dertgira administrativa (SDA A 05 89 dils 25 d’avrel 2006) sco era il tribunal federal confirmau (TF 2P.194/2006 dils 7 d’uost 2006). a) Tenor la communicaziun digl uffeci da schazetg dil cantun Grischun dils 8 d’uost 2016 ei il recurrent proprietari giuridic d’ina casa da habitar („Wohnhaus“) a B._____ ella vischnaunca O.1._____. Plinavon eis el buca suttamess illimitadamein alla taglia ella vischnaunca O.1._____, cunquei ch’el ha siu domicil a O.2._____ (vischnaunca dad O.3._____). Il recurrent sa star sur notg en sia casa a B._____ senza motivar in domicil da dretg fiscal en quella. Plinavon ha el la pusseivladad da duvrar la purschida turistica. En quei connex eis ei buca decisiv, sche l’infrastructura turistica vegn effectivamein nezegiada ni buca (SDA A 12 36 dils 28 da settember 2012). La taxa da hosps ei numnadamein – sco era la taxa turistica – tenor la scienzia e la giurisdicziun ina taglia attribuida als cuosts che vegn adossada ad in cert cerchel da pagataglias, perquei che quellas persunas han sco caschunaders ina relaziun pli stretga cun certas expensas dalla communitad che la totalitad dils pagataglias. Taglias attribuidas als cuosts han ina certa parentella cun la taxa preferenziala, mo ellas sedifferenzieschan da quella entras il fatg ch’ei basegna buc in avantatg special individual, imputabel alla singula persuna obligada, per giustificar igl incassament dalla taxa. Ei tonscha che las expensas respectivas ein d’adossar plitost al cerchel da persunas definidas sco obligai che alla communitad, seigi quei perquei che quella gruppa profitescha en general (abstractamein) pli ferm dallas prestaziuns che auters ni perquei ch’ella sa vegnir considerada – abstractamein – sco

- 14 caschunadra principala da quellas expensas. La taglia attribuida als cuosts ei ina taglia, perquei ch’ella vegn incassada senza cunterprestaziun, qvd. independentamein dil nez concret digl obligau ni dalla part concreta dil caschunader obligau (PDA 2006 nr. 19 consid. 4; SDA A 16 2 dils 16 da fevrer 2016 consid. 3 cun ulteriuras indicaziuns; SDA A 05 89 dils 25 d’avrel 2006 consid. 3). b) Per ch’ei vegni incassau ina pauschala annuala obligatoria, sto ei setractar tier igl object d’ina habitaziun da vacanzas, quei ch’il recurrent contesta. Sco habitaziuns da vacanzas el senn dalla lescha valan habitaziuns ni casas ch’ein affittadas periodicamein a fittaders ch’ein buca domiciliai en vischnaunca (qvd. che han tenor il CCS negin domicil en vischnaunca) ni ch’ein en proprietad d’ina persuna natirala resp. giuridica che ha en vischnaunca negin domicil ni negina sedia tenor il dretg civil (art. 4 lit. d LT). Tenor la communicaziun digl uffeci da schazetg setracta ei tier igl object relevont d’ina casa da habitar („Wohnhaus“) en proprietad dil recurrent. En connex cun la calculaziun dalla locaziun sin pagina dus dalla communicaziun vegn l’alzada sura („OG“) digl object qualificada sco casa da vacanzas („Ferienhaus“) cun 2.5 stanzas. Il recurrent fa buca valer che la communicaziun seigi buca correcta, e perquei dat ei era negins indezis. Era sche la casa ei buca affittada periodicamein a fittaders ch’ein buca domiciliai en vischnaunca, eis ella en proprietad dil recurrent che ha negin domicil ella vischnaunca. c) Il recurrent fa valer ch’el seigi sin basa dad art. 15 lit. f LT deliberaus da pagar ina taxa da hosps. Tenor la sistematica sereferescha quella norma ad excepziuns dall’obligaziun alla taxa mo en connex cun la taxa turistica (art. 13 e suandonts LT) e buca cun la taxa da hosps (art. 5 e suandonts LT). Cun quei ei art. 15 LT el cass present buca applicabels ed ulteriuras explicaziuns ein buca necessarias. Plinavon argumentescha il recurrent che la casa seigi ina part integrala dil menaschi puril e ch’ella vegni

- 15 duvrada sulettamein per intents agricols e buca per vacanzas. Sebasond sin art. 6 al. 1 lit. b LT stoppi el perquei vegnir deliberaus dalla taxa da hosps. Tenor quella norma ein denter auter persunas liberadas dalla taxa da hosps che lavuran en lur professiun tenor in urari da lavur usitau, ch’ein denton buca participontas dad occurrenzas sco eveniments sportivs, congress, seminaris, dietas, cuors eav., era sche quellas surveschan ad intents professiunals. D’ina vart ei il bein immobigliar tenor la communicaziun digl uffeci da schazetg qualificaus sco bein immobigliar buca agricol e la casa ei qualificada sco casa da vacanzas. Da l’autra vart explichescha il recurrent sez ch’el pernotteschi buca igl entir onn a O.4._____ per sededicar allas lavurs agricolas, mobein mo temporarmein tut tenor la stagiun, la vegetaziun e l’aura. Schizun sch’il recurrent pernottescha leu da temps en temps per motivs professiunals, san el sez (sco proprietari giuridic ed economic che affittescha buca) sco era ses visitaders nezegiar igl object sco casa da vacanzas duront il temps restont. Con savens che la casa vegn effectivamein nezegiada en quella moda, ei buca relevont. Cun la pauschalisaziun sco fuorma particulara per eruir la summa da taglia, renunzian ins numnadamein sapientivamein da sclarir las basas d’imposiziun exactas e sebasa enstagl da quei sin relaziuns en media (PDA 1997 nr. 42). La pauschala annuala vegn calculada el cass present sulettamein tenor la grondezia dalla habitaziun (art. 10 al. 3 LT), quei ch’il tribunal federal ha considerau sco legitim (TF 2C_951/2010 dils 5 da fenadur 2011 consid. 2.4; SDA A 05 89 dils 25 d’avrel 2006, confirmau en TF 2P.194/2006 dils 7 d’uost 2006). La calculaziun succeda perquei independentamein dalla dimensiun dall'utilisaziun effectiva d'ina habitaziun da vacanzas entras il proprietari e ses visitaders, e la pauschala annuala obligatoria ei da pagar independentamein dil cuoz e dallas frequenzas dalla dimora. La finala eis ei buc ina premissa per l'obligaziun da pagar taglia ch'igl object vegni

- 16 nezegiaus turisticamein ed affittaus a hosps da vacanzas. Aschia ein tut las premissas tenor art. 10 al. 1 LT ademplidas. d) La pauschala annuala obligatoria importa fr. 6.50 tochen fr. 12.00 per meter quadrat dalla surfatscha da habitar netta ed onn (art. 10 al. 3 LT) e vegn fixada ed incassada mintgamai per igl onn calendar sco perioda da taglia (art. 6 DELT). Tenor art. 7 lit. c DELT (sebasond sin art. 11 al. 1 LT) importa la pauschala annuala obligatoria per agen diever fr. 7.00 per meter quadrat dalla surfatscha da habitar netta ed onn, ed ei cun quei plitost bassa visavi il rom dils cuosts. Il vischinadi da O.4._____ ei repartius ella zona turistica C (art. 12 DELT) e cun quei en ina zona cun intensitad turistica bassa. En quella zona importan las taxas 70% dallas tariffas fixadas. Quella reducziun vegn concedida denter auter a proprietaris da habitaziuns da vacanzas (art. 21 al. 1 e 2 LT). La surfatscha da habitar netta corrispunda alla surfatscha utilisabla per mintga habitaziun tenor la communicaziun digl uffeci da schazetg (art. 4 lit. f LT). Il recurrent fa valer che la surfatscha da habitar netta seigi tenor la communicaziun dils 8 d’uost 2016 68 m2 e buca 78 m2 sco tenor il quen dalla vischnaunca. El mument che la vischnaunca ha fatg il quen per igl onn calendar 2015 era quella communicaziun denton aunc buca existenta. Tenor la posiziun dils 15 da matg 2017 ei la vischnaunca sebasada per la surfatscha da habitar netta, ch'era la basa per il quen dils 27 da november 2015, sin il formular d'incassament emplenius dil recurrent ils 17 da fenadur 2015. En quei formular ha quel confirmau cun suttascripziun ina surfatscha da habitar netta da 78 m2. Che la vischnaunca ha duvrau quella cefra silsuenter per calcular la taxa da hosps per igl onn 2015, ei perquei buca da criticar. Ulteriuramein fa il recurrent buca valer che la taxa da hosps seigi memia aulta. Per quei dat ei era negins indezis (SDA A 05 89 dils 25 d'avrel 2006). Secund las explicaziuns precedentas ei il quen dalla vischnaunca concernent la taxa

- 17 da hosps ell'altezia da totalmein fr. 382.20 (78 m2 x fr. 7.00 x 0.70) buca da criticar. La vischnaunca vegn perencunter obligada en vesta da sias explicaziuns ella posiziun dils 15 da matg 2017 da curreger dad ella anora las taxas da hosps gia incassadas per ils onns 2015 e 2016 per igl object „B._____“ sin fundament dalla communicaziun digl uffeci da schazetg dils 8 d'uost 2016 e da bunificar al recurrent la differenza a caschun dalla proxima facturaziun, sco era da risguardar per ils quens futurs la surfatscha da habitar netta da 68 m2. 5. Tenor las explicaziuns precedentas ei la decisiun da protesta contestada dils 2 da zercladur 2016 legitima, quei che meina a sia confirmaziun cumpleina ed al renviament dil recuors. 6. Sin fundament dil resultat present dalla procedura van ils cuosts a quen dil recurrent sco part perdenta (art. 73 al. 1 LGA). Alla vischnaunca vegn concedida negina indemnisaziun dallas parts, cunquei ch’ella ha gudignau en siu camp d’activitad ufficial (art. 78 al. 2 LGA). Il derschader singul decida damai: 1. Il recuors vegn refusaus. 2. Ils cuosts da dertgira, consistents - d’ina taxa dil stadi da fr. 200.-- - e dallas expensas da canzlia da fr. 338.-total fr. 538.-van a quen da A._____ ed ein da pagar enteifer 30 dis suenter la consigna da questa sentenzia all’administraziun da finanzas dil cantun Grischun, Cuera.

- 18 - 3. [indicaziun dals meds legals] 4. [Communicaziun]